يوميات واحد بينسى

بسم الله و الحمد لله






نكتة قديمة




بيقولك



واحد راح للدكتور قاله يا دكتور انا بتجيلى حالة نسيان رهييييبة



بنسى بسرعة جدااا .. بنسى اى حاجة



الدكتور قاله : مممممم , و الحالة دى بتجيلك من امتى



قام الراجل قاله : حالة ايه يا دكتور ؟!





الراجل نسى انه بينسى أساسا
نكتة قديمة و ممكن تسمعها تبتسم كده و خلاص



بس بجد ان كل ما بسمعها بموت م الضحك



لانها بتفكرنى بشخص ..
كل ما ابص فى المراية اشوفه




بجد موضوع النسيان ده عامللى أزمة فى حياتى


على اد ما ممكن تحصل مواقف طريفة ( )
بس ممكن تحصل كوارث و مشاكل و زعل بسبب النسيان ده



ده مش نسيان .. ده زهايمر متفشى و متشعب و متوسع فى جميع خلايا المخ





***



إحنا اتغدينا إيه انهاردة
و ازيك يا ريس
طب تااااكس






سيبك بقه من اكلت ايه امبارح و اتغديت ايه من شوية
لان الحاجات دى بتتبخر اول ما بقوم من ع السفرة على طول



مبفتكرش منها حاجة



و سيبك كمان من لما تقابل حد صدفة او حتى مش صدفة ..
و تيجى تسلم عليه ..
و تاخده بالحضن ( ياااه دا حبيبك بقا على كدا )

و هوباااا

مش عارف تقوله ازيك يا إيـه

و يبقى شكلك بايخ اوى
و بتبان على طول مهما حاولت تدارى بالجمل المشهورة

" عامل ايه يا بوب "
" اخبارك ايه يا ريس "
" انت فين يا باشا من زمان محدش بيشوفك "


لأن الجمل دى خلاص اتفقست و اتعرف ان اللى بيقولهالك يبقى على طول ناسى اسمك





لكن اللى يفرسنى



ساعة ما أكون واقف فى الشارع عشان أوقف تاكسى و ولا تاكسى راضى ييجى و لو جه يبقى محمل 4 تنفار ..

و أول ما ييجى تاكسى فاضى و أشاورله و يقف

و نيجى عند اللحظة اللى المفروض الراكب يقول للسواق هو عاوز يروح فين ..

مفيـــش

مش فاكر اسم الشارع ولا المنطقة ولا الحى ولا أى حاجة خااالص




انا عارف المكان كويس و اعرف السكة تمام

انما عشان أقول الأسامى بتاعت كل دا ..
انسى


لمدة ثوانى طويلة السواق باصصلى .. و انا موطى عشان أشوف وشه و باصصله متنح .. ولا كلمة

الراجل قاطع صمتى الرهيب و قال لى أؤمر يابنى .. رايح فين ؟

سؤال وجيه برضو

مش فاكر والله يا حاج
طب اتفضل انت مع السلامة
أنا آسف جدا و الله اتفضل انت


الراجل قعد يبرطم و تقريبا شتم و راح طالع بالتاكس بنرفزة
افتكرنى بشتغله و شباب اخر زمن و بتاع




***




هو انهاردة ايـــه ؟؟





سؤال عادى جدا مشهور كلنا ممكن نسأله فى أول اليوم ..

لكن الغريب انى ممكن أسأل السؤال دا كزا مرة فى نفس اليوم و لنفس الشخص




اللى قدامى :



- يا إما يفتكرى بشتغله .. فا ميعبرنيش



- يا إما يتخنق منى و يشد فى شعره



- يا إما يكون عارفنى اوى .. فا يرد عليا و يقوللى :
لسابع مرة بقولك انهاردة الجمعة يا حبيبى احنا لسة خارجين من صلاة الجمعة



و يروح مطبطب على كتفى كأنى مجنون بالظبط





***






الاتنين : عادة , و محمووول








صاحبى اللى كان بيصلى معايا الجمعة ده .. فاكرينه ؟



كنت قاعد ع الكمبيوتر




و اتصل بيا ع التليفون فى البيت عشان كان فى مشوار ضرورى لازم نعمله كان بيتصل يفكرنى بيه



المهم و انا بكلمه جرس الباب رن



قلتله لحظة خليك معايا يا بوب هروح افتح الباب و اجيلك



المهم بعد ما خدت المكوة و حاسبت الواد المكوجى .. رجعت



قعدت على الكمبيوتر عادى خالص مالص




شوية كتييييرة ..



و سمعت صوت كده زى ما يكون الفيبريشن بتاع الموبايل




قعدت ادور على الموبايل مش فاكر انا حاطه فين



و الفيبريشن واطى مش قادر احدد مكان التليفون بالظبط



هتقولى طب انت قاعد فى البيت عامل التليفون فيبريشن ليه



اقولك معلش اصلى نسيت اظبطه



المهم فيــن لحد ما لاقيت التليفون و بقول الو



لاقيته بوب ..



- ازيك يا بوب



- تصدق بالله ؟



- لا إله إلا الله



- انت اللى مسكك تليفون ظلمك




- ليه كده يا بوب ؟؟



- روح اقفل السماعة بتاعة البيت يا حيوان عشان اكلمك




ببص على السماعة لاقيتها مرفوعة من ساعة ما رحت فتحت للمكوجى




***



كلو كوم





و المفاتيح كوم تانى



مأساة فى حياتى




م الاخر ..



اللى يلاقى اى ماديلية مفاتيح ضايعة فى الشارع مش بتاعة حد .. ييجى يقوللى اوصافها الله يكرمكو لانها اكيد أكيـد بتاعتى




اى مكان ادخله .. ارمى المفاتيح فى اى حتة و انسى اخدها و انا ماشى



هتقوللى طب ماتحطها فى جيبك



أقولك تعمل ايه بقه فى الألاطة



لازم امسكها فى ايدى و العب بيها طول مانا ماشى





كنت عند واحد صحبى فى البيت بنظبط هاردات .. و نزلت من عنده متأخر



و لما روحت البيت .. بدب اييدى فى جيبى مالقتش المفاتيح



قلت خير خير ما يجراش حاجة اخبط يمكن حد من الأهل و الأقارب لسه صاحى



اخبط .. محدش بيرد



قلت خلاص اكلم صحبى اقوله ع الورطة اللى انا فيها و يجيلى بالمفاتيح , هو معاه عربية



بدب ايدى فى جيبى عشان اجيب التليفون اكلمه



تتوقع ايه ؟؟؟؟



نسيت التليفون كمان عند الواد



و طبعا لو حد متخيل انى ممكن اكون حافظ نمرة صحبى او نمرة اى حد فى الدنيا يبقى لسه مستوعبش المأساه اللى بعيشها



فين و فين لما افتكرت نمرة بيتنا .. رحت نازل اتكلمت ع البيت من السنترال اللى جنبينا .. محدش بيرد بردو .. نايمي



الراجل اللى فى السنترال صعبت عليه و قاللى انا ببات هنا .. بات معايا يابنى بقه و أمرك لله



بس الحمد لله الحاج ابويا صحى و رد ع التليفون و اتخض طبعا لما لاقانى بتصل فى الوقت ده




بس اطمن عليا على طول لما لاقانى بقوله : بابا افتحلى الباب




ساعتها بس فهم انى كالعادة راجع من برة و المفاتيح ضايعة




الحل




امى اقترحت سلسلة و احط فيها المفاتيح و اعلقها فى رقبتي



أما ابويا كان اقتراحه انى ألبس حاجة زى الانسيال و اعلق فيه المفاتيح
بس يكون موصل بدايرة كهربية مجهزة .. بحيث لو المفاتيح بعدت عنى مسافة معينة ..
اتكهرب على طول







***








خيبة الله على الزهايمر





ياترى اللى هيقرا الموضوع هيكون بينسى زى كدة